«Агробанк» Олтинсой филиали бошқарувчиси хизмат автомобилида ЙТҲга учради

Ижтимоий тармоқларда Сурхондарё вилояти туманларининг бирида «Агробанк» бошлиғи банкка олинган янги Onix автомобилини маст ҳолда бошқариб, аварияга учрагани тўғрисида хабар тарқалди. «Агробанк» матбуот хизмати ҳолат бўйича расмий маълумот берди.

Фото: Видеодан кадр

Аниқланишича, банкнинг Олтинсой филиали бошқарувчиси, 1989 йилда туғилган А.Я. филиалга тегишли бўлган давлат рақами белгиси 75 747 ZAA оқ рангли Chevrolet Onix автомобилини 18 апрел куни кеч соат 23:00 лар атрофида бошқариб кетаётганида йўл-транспорт ҳодисасига учраган.

ИИВ Йўл ҳаракати хавфсизлиги хизматининг сўровномасига асосан Олтинсой туман тиббиёт бирлашмаси врачи, нарколог томонидан наркологик экспертиза ўтказилиб, 18 апрелдаги «Мастлик ҳолатини аниқлаш бўйича тиббий текширувдан ўтказганлик тўғрисида»ги хулосасида мастлик ҳолати аниқланмагани қайд этилган.

Ҳозирда мазкур йўл-транспорт ҳодисаси юзасидан ЙҲХХ ва ички ишлар тергов органи томонидан дастлабки суриштирув ишлари олиб борилмоқда. Суриштирув натижалари юзасидан қўшимча маълумот берилади.

#Агробанк #Олтинсой