Кучли ёмғир ва қаттиқ шамол Қорақалпоғистон ва Хоразмнинг айрим ҳудудларини электрсиз қолдирди

Қарийб 8 мингта истеъмолчи электр тармоғидан узилгани таъкидланмоқда.

20 март куни соат 22:30 да кучли ёмғир ва қаттиқ шамол таъсирида Қорақалпоғистон Республикасида 5 та, Хоразм вилоятида эса 9 та электр узатиш тармоғида носозлик юзага келди. Бу ҳақда Энергетика вазирлиги хабар берди.

Қайд қилинишича, Қорақалпоғистон Республикасининг Тўрткўл, Тахиатош ва Қўнғирот туманларида истиқомат қилувчи 1 минг 200 та, Хоразм вилоятининг Гурлан, Қўшкўпир, Урганч ҳамда Хонқа туманларида истиқомат қилувчи 6 минг 750 та истеъмолчи электр таъминотидан узилган.

Таъкидланишича, махсус бригадалар томонидан носозликлар бартараф этилмоқда.

Аввалроқ, 20-22 март кунлари Ўзбекистоннинг айрим ҳудудларида кучли ёмғир ёғиши кутилаётгани ҳақида хабар берилган эди.

#об-ҳаво #Энергетика #техноген авария