Apple арзон iPhone SE ишлаб чиқаришдан воз кечади 

Таҳлилчи Мин-Чи Куо маълумотларига кўра, Apple эҳтимолий iPhone SE 4 ишлаб чиқаришни кейинга қолдирган ёки ҳатто бекор қилган. Бунинг сабаби арзон смартфон моделига бўлган талабнинг ниҳоятда пастлигидир. 

Куо сўзларига кўра, энг оптимистик сценарийда навбатдаги арзон iPhone 2024 йилдан кейин ишлаб чиқарилиши мумкин. Пессимистик сценарийда эса Apple уни чиқариш ғоясидан бутунлай воз кечади. 

Аввалроқ iPhone SE 4 смартфони iPhone XR услубидаги «рамкасиз» дизайнга эга бўлиши, бу катта маблағ талаб қилиши ва нархининг ошишига олиб келиши ҳақида хабар берилганди. Оқибатда, ушбу смартфонни ишлаб чиқариш учун сарфланган маблағлар ўзини оқламаслиги мумкин ва Apple буни яхши тушуняпти. 

Куонинг қўшимча қилишича, iPhone SE 4 смартфонидан воз кечиш Apple компаниясига 2023 йилдаги глобал иқтисодий таназзул муаммоларини енгишда ёрдам беради. 

iPhone SE (2022) смартфонининг сўнгги версияси март ойида 430 доллар нархда чиқарилган эди. У 4,7 дюймли Retina HD дисплейи, IP67 сув ҳимояси, Home тугмаси, 12 мегапикселли камера ва яхшиланган батарея билан жиҳозланди. 

Бироқ, смартфонга талаб жуда паст бўлди. Асосий сабаблардан бири - эскирган дизайн, кичик экран ва заиф батарея. Таъкидланишича, Apple ҳатто талабнинг пастлиги туфайли ишлаб чиқаришни қисқартиришга мажбур бўлган. 

iPhone SE биринчи авлоди 2016 йилда чиқарилган. Бугунги кунда бу «эски» дизайнда ишлаб чиқарилган, аммо замонавий процессорга эга бўлган энг арзон Apple смартфонидир.