Ҳасан Руҳоний ўз президентлиги вақтида йўл қўйилган хатолар учун Эрон халқидан узр сўради

“Бугун Эроннинг 12-ҳукуматининг охирги йиғилиши бўлиб ўтди. Бу шунингдек, менинг Ислом Республикаси президенти сифатидаги охирги баёнотимдир. Ўтган йиллар давомида ўз баёнотларимизда халққа ёлғон гапирмадик. Биз ростини сўзладик. Бироқ мен бу фойда келтирмайди деб ҳисоблаган ёки миллий бирдамликка путур етказади деб хавотирланган баъзи вақтларда ҳақиқатни яширишимга тўғри келган”, деб айтган Руҳоний.

У ўзининг биринчи президентлик муддати – 2013-2017 йилларда Эрон жаҳон ҳамжамияти билан ҳамкорлик қилгани ва иқтисодий шароитлар катта истиқболга эга бўлгани, бироқ АҚШ 2018 йилда ядро келишувидан чиқиб, Теҳронга қарши санкцияларни тиклагандан кейин вазият ёмонлашгани, бунинг оқибатида Эрон иқтисодий уруш марказида қолганини таъкидлаб ўтган.

“Биз сиёсатимиз имкони борича камроқ хато ва камчиликларга эга бўлиши учун ҳаракат қилдик. Агар бирор нарса кутганингиздек чиқмаган бўлса, бунинг учун халқ олдида узр сўрайман”, деб айтган Руҳоний.

Унинг таъкидлашича, “аҳоли ўз турмуш даражасидан норози ва бу ҳақиқатдир”. “Биз иқтисодий уруш ҳолатида бўлдик ва шундан келиб чиқиб нима қила олганимизга назар ташлаш керак”, деб қўшимча қилган Эрон президенти АҚШ санкцияларини назарда тутиб.

Руҳонийнинг таъкидлашича, у бошчилик қилган ҳукуматнинг саъй-ҳаракатларига қарамай, мамлакатдаги баъзи кучлар санкцияларнинг бекор қилинишига тўсқинлик қилган.

“Агар кўпроқ даражада миллий бирдамлик бўлганда ва барча давлат идоралари бизни қўллаб-қувватлаганда ҳамда ҳукумат билан ҳамкорлик қилганда мамлакатдаги ҳозирги вазият бир неча маротаба яхшироқ бўларди”, деб айтган Эрон президенти.

Эронда 18 июлда президент сайловлари бўлиб ўтди. Унинг натижаларига кўра, Иброҳим Раисий ғалаба қозонди. Раисий 3 августда президентлик ваколатларини бажаришга киришади, 5 августда эса унинг инаугурацияси бўлиб ўтади.