Карантинни бузган санъаткорлар: Сенат қўмитаси раиси буни ҳурматсизлик деб баҳолади, Маданият вазирлиги баёнот билан чиқди

Маълумки, кейинги кунларда ижтимоий тармоқларда «Браво» жамоаси вакили Аҳмад Темиров ҳамда хонанда Воҳиджон Исоқовларнинг никоҳ тўйлари тасвирланган видео ва фотолавҳалар тарқалди.

Баёнотда таъкидланишича, Маданият вазирлиги ушбу хатти-ҳаракатларни маъқулламайди ва карантин қоидалари истисносиз ҳар бир шахс учун мажбурийлигини, уни бузганларга қатъий чора кўрилишини қўллаб-қувватлайди.

«Бироқ, юртимизда яшаётган ҳар бир фуқаро, қандай касб эгаси бўлишидан қатъий назар маълум ҳуқуқ ва мажбуриятларга эга. Уларнинг шахсий ҳаётини назорат қилишга ҳеч кимнинг ҳақи йўқ. Жумладан, Маданият вазирлиги ҳам санъаткорларнинг шахсий ишларига аралашиш ваколатига эга эмас. Вазирликнинг низом билан тасдиқланган фаолият чегаралари мавжуд бўлиб, ундан ташқарига чиқиш қонунан мумкин эмас. Шахснинг жамиятдаги хатоси ёки жинояти учун чора кўришга масъул бўлган органлар қонуннинг барча учун баробарлиги тамойилига асосланган ҳолда фаолият олиб борадилар.

Табиийки, санъат аҳли миллионлаб мухлисларнинг нигоҳида ва диққат марказида бўлади. Лекин, бу унга қандайдир имтиёз эмас, аксинча улкан жавобгарлик ва масъулият юклайди», - дейилади баёнотда.

Маданият вазирлиги соҳа вакилларидан ўз ҳаёт ва фаолиятларида юқоридаги мезонга амал қилишни сўраган. Масъул идораларни белгиланган меъёрларни бузган санъаткорларнинг жавобгарликларини таъминлаш учун қонуний чоралар кўришга чақирган.

Сенатнинг Ёшлар, маданият ва спорт масалалари қўмитаси раиси Бахтиёр Сайфуллаевнинг билдиришича, табриклаш учун келган ўндан ортиқ санъаткорлар ҳамда юзга яқин меҳмонларнинг ижтимоий масофа сақлаш, ниқоб тақиш нима эканлиги ёдларидан ҳам чиқиб кетганлигини тарқалган видео ва фотолардан яққол кўриниб турибди.

«Албатта, ёшларимизни янги оила остонасига қадам қўйганликлари билан табриклайман. Аммо коронавирус балоси ҳали ўз таъсир кучини кўрсатиб, кундан-кунга касалланиш ортиб бораётган бир вақтда махсус комиссия талабларига зид равишда 30 кишидан ортиқ меҳмонларни йиғиб, карантин тартиб қоидаларга риоя этмаслик ва охир-оқибат яқинларимизнинг соғлиғини, ҳаётини хавф остига қўйиш тўғрими?», - деб ёзади сенатор.

Унинг айтишича, бундай хатти-ҳаракатлар «тартиб қоидаларга зид равишда мана шундай тўй ўтказиб, белгиланган жаримани тўлаб кетиш билан осонгина қутулиш мумкин» деган нотўғри хулосалар шаклланишига сабаб бўлиши мумкин. Бундай тадбирлар касаллик тарқалишига олиб келмайди деб ҳеч ким кафолат беролмайди.

«Ахир халқ кўз ўнгида юрган, санъат оламига дахлдор одам бошқалардан кўра маданиятлироқ бўлиши, керак бўлса, жамиятидаги хайрли ишлар ва янгиликларни амалга оширишга кўпроқ ҳисса қўшиб, ёшларга ўрнак кўрсатиши керак эмасми?   

Бу каби кўра-била туриб тартиб-қоидани менсимай бузганлар фақатгина маълум бир миқдорда жарима тўлаш билан қутулиши етарли эмасдек, назаримда. Жамият қоидаларига, инсонлар ҳаётига бунчалар беписандалик билан қараш кўринмас душман билан олишиб жонларини фидо қилган юзлаб шифокору-ҳарбийларимиз, юртдошларимиз хотираси ва меҳнатларига нисбатан ҳам ҳурматсизлик деб баҳолашга лойиқ», - дейди Бахтиёр Сайфуллаев.

Ушбу ҳолатлар бўйича Маданият вазирлигига сенатор сўрови юборилгани ва мазкур масала Сенатнинг Ёшлар, маданият ва спорт масалалари қўмитаси томонидан назоратга олингани айтилади.

Аввалроқ, 29 ёшли Аҳмад Темиров тўйини Шайхонтоҳур туманидаги уйида ташкиллаштиргани ва тўйга 40 нафардан ортиқ меҳмонлар келишгани маълум бўлганди. Тошкент шаҳар ИИББ мазкур факт асосида Маъмурий жавобгарлик тўғрисидаги кодексининг 54-моддаси (“Эпидемияларга қарши кураш қоидаларини бузиш”) бўйича маъмурий баённома расмийлаштирилганини билдирди.

16 сентябрь куни эса 32 ёшли Воҳиджон Исоқов Шайхонтоҳур туманида амалдаги санитария-эпидемиология талабларини бузган ҳолда тўй тадбири ўтказгани маълум қилинди. Пойтахт ИИББ ахборот хизмати хабарига кўра, фото ва видеолардаги меҳмонлар сони 50дан ошган. СЭХ ишчилари томонидан мазкур факт асосида тадбирни ташкиллаштирган Воҳиджон Исоқов Маъмурий жавобгарлик тўғрисидаги кодексининг 54-моддасига кўра жаримага тортилди. Унга ЭКИҲнинг 5 баравари миқдорида жарима белгиланди.