Қўшимча функционаллар
-
Тунги кўриниш
Россиялик машҳур тадбиркор Олег Тиньковга илик трансплантация қилинди
Россиянинг «Тинькофф банк» муассасаси асосчиси Олег Тиньков мураккаб жарроҳлик амалиётидан ўтди. Март ойида лейкемия билан хасталанганини эълон қилган тадбиркорга яқинда илик трансплантацияси муваффақиятли амалга оширилди.
Фото: Instagram /olegtinkov
«Ҳаммаси жойида, бугун коридорда 2 км юрдим. Аммо олдинда жуда мураккаб реабилитация ҳафталари ва ойлари борлигини тушуниб турибман», — деб ёзди Тиньков Instagram саҳифасида.
Шунингдек, тадбиркор россияликларга донорлик билан шуғулланиш ҳақида ўйлаб кўришни маслаҳат берди.
«Илтимос қиламан, донор бўлинг ва бошқа одамнинг ҳаётини сақлаб қолинг. Россияда атиги 130 минг донор бор, Германияда эса 7 миллион. Бу биз учун уят», — деб ёзди Тиньков.
У хотини билан бирга шундай катта муаммо билан шуғулланадиган жамғарма ташкил қилмоқчи эканини ҳам қўшимча қилган.
Июнь ойи охирида Тиньков «Лондонда илик трансплантациясига розилик билдиргани, кейин ўзини жуда узоқ, ҳатто 1 йилгача чўзиладиган реабилитация кутаётгани» ҳақида ёзган эди.
6 март куни Тиньков лейкемия билан хасталанганини, бундай диагноз 2019 йил октябрь ойида қўйилганини эълон қилди. Ўша пайтда тадбиркор Лондон шаҳрида солиқ даъволари бўйича АҚШга экстрадиция қилиниши бўйича суд ҳукмини кутаётган эди.
Тиньковнинг баёнотидан олдин АҚШ Молия вазирлиги ишбилармонни 2013 йилда АҚШ фуқаролигидан воз кечиш жараёнида 1 миллиард доллар миқдоридаги активларини солиқлардан яширганликда гумонлаётганини билдирган эди. Бу айблов бўйича унга 6 йилгача бўлган қамоқ жазоси хавф солмоқда.
