Туркия Ливиядаги элчихонаси ўққа тутилгач Ҳафтар армиясига жавоб зарбаси беришга тайёрлигини билдирди

Анқара Ливия пойтахти Триполидаги элчихонанинг ўққа тутилишида фельдмаршал Халифа Ҳафтар кучларини айблади. Туркия агар бундай вазият такрорлангудек бўлса, Ҳафтар тузилмаларига жавоб зарбалари берилишидан огоҳлантирди.

Фото: Hani Amara / Reuters

Бу ҳақда Туркия ташқи ишлар вазирлигида маълум қилинди.

Таъкидланишича, охирги кунларда Ҳафтар кучлари фуқаролар ва фуқаролик объектларига ҳужумларини кучайтирган ва бу ҳужумлардан бирида Туркия элчихонасига зарар етган. Вазирлик хабарида таъкидланишича, 9 май куни Ҳафтар тузилмалари Триполи марказини артиллериядан ўққа тутиб, 100 дан кўпроқ ракета билан зарба берган.

Охирги кунлар давом этаётган бу зарбалар остида дипломатик миссиялар, жумладан Туркия элчихонаси, Митига аэропорти, парвоз қилишга тайёргарлик кўрган фуқаролик самолётлари ва бошқа фуқаролик объектлари қолган.

“Шу муносабат билан яна бир бор таъдкидлаб ўтамиз, агар Ливиядаги ваколатхоналаримиз ва манфаатларимизга зарба берилса, биз Ҳафтар тузилмаларини жавоб зарбаси бериш учун қонуний нишон сифатида қабул қиламиз”, дейилган хабарда.

Туркия ташқи ишлар вазирлигида, шунингдек, БМТнинг Ливиядаги воқеаларга ҳеч қандай муносабат билдирмаётгани йўл қўйиб бўлмас ҳолат деб аталган. “Ҳафтарга ҳарбий, молиявий ва сиёсий ёрдам кўрсатаётган давлатлар Ливия халқи чекаётган азоб-уқубатлар ва мамлакат тортилаётан алғов-далғовлик ва барқарорсизлик учун жавобгардир”, деб таъкидлаб ўтилган вазирликда.

28 апрелда Халифа Ҳафтар мамлакатда бошқарувни ўз қўлига олишини ва Фаёз Саррож бошчилик қилувчи Миллий келишув ҳукумати шаклланишига олиб келган келишувдан чиқишини эълон қилган. Ҳафтар унга бўйсунувчи кучлар халқ уқубатларини енгиллаштириш, фуқаролар ҳуқуқларини ҳимоялаш, уларнинг истакларини амалга ошириш ва улар равнақи учун ишлашини айтган.

Икки кун ўтиб Ҳафтар бошчилик қилувчи Ливия миллий армияси вакили Ҳафтар кучлари муқаддас Рамазон ойида барча жанговар ҳаракатларни тўхтатишини эълон қилган. Бироқ у шу билан бирга армия ярашув шартларининг ҳар қандай бузилиши учун дарҳол жавоб беришини қўшимча қилган.

Шунга қарамай, Ливияда жанговар ҳаракатлар давом этган. Жумладан, Италия ва Туркия 7 май куни Триполидаги “яшил ҳудуд” ўққа тутилганини маълум қилган. Бироқ Ливия миллий армияси вакили Ҳафтар кучларининг Триполидаги аҳоли яшаш ҳудудлари, жумладан дипломатик объектлар ўққа тутилишига алоқадор эмаслигини маълум қилган.

#Туркия #Ливия #Халифа Ҳафтар