Ispaniyada internet va mobil aloqa uzilib qoldi

Ispaniyada mahalliy mobil operatorlar faoliyatida jiddiy uzilish kuzatildi, deb xabar beradi El Pais.

Qayd etilishicha, Madrid, Barselona, Valensiya, shuningdek, Andalusiya, Basklar mamlakati, Ekstremadura va Aragon kabi yirik shaharlarda mobil internet va aloqa ishlamay qolgan.

Dastlabki ma’lumotlarga ko‘ra, aloqa tizimidagi uzilishlar qator mobil operatorlarga egalik qiluvchi Telefonica telekommunikatsiya kompaniyasi tomonidan amalga oshirilgan texnik modernizatsiya ishlariga bog‘liq. Kompaniya vakillarining ta’kidlashicha, «tarmoqning yangilanishi ayrim servislar ishiga ta’sir ko‘rsatgan bo‘lishi mumkin».

Uzilishlardan Movistar, Orange, Vodafone, Digimobil va O2 kabi operatorlar foydalanuvchilari jabr chekkan. Downdetector monitoring servisiga ko‘ra, nosozliklarga oid ilk xabarlar mahalliy vaqt bilan tungi soat 02:00 larda paydo bo‘lgan. Jami shikoyatlarning 72 foizi aloqa ishidagi uzilishlar, 18 foizi — signal yo‘qligi va 10 foizi — aloqa butunlay o‘chib qolgani bilan bog‘liq. Ispaniya Raqamli transformatsiya va davlat xizmatlari vazirligi «vaziyatni diqqat bilan kuzatib borayotganini» ma’lum qildi.

Bu Ispaniyada bir oy ichida kuzatilgan ikkinchi yirik texnologik muammo hisoblanadi. Aprel oxirlarida, Ispaniya, shuningdek, Portugaliya va Fransiya janubida istiqomat qiluvchi aholi bir necha soatda elektr energiyasi ta’minotidan uzilib qolgandi. Blekaut 50 millionga yaqin aholi yashaydigan hududlarni qamrab olib, zamonaviy Yevropa tarixida elektr energiyasi ta’minoti uzilishi bilan bog‘liq eng yirik hodisaga aylangan edi.