Parkentdan Toshkentgacha temiryo‘l quriladi

Toshkent viloyatining Parkent tumani markazidan poytaxtgacha qariyb 24 km uzunlikda temiryo‘l qurilmoqda. Bu haqda viloyat hokimligi xabar berdi.

«Parkent tumanini poytaxt bilan bog‘lovchi «Baytqo‘rg‘on–Parkent» elektrlashtirilgan temiryo‘lining qurilishi jadal olib borilmoqda. Bu yo‘lning umumiy uzunligi 23,8 kilometrdan iborat. Loyiha doirasida 2 ta ajratish punkti, 4 ta ko‘prik, 2 ta yo‘l o‘tkazgich, 1 ta tunnel turidagi yo‘l o‘tkazgich, 78 ta suv o‘tkazish inshooti, 7 ta avtomobil yo‘li va temiryo‘li kesishmasi qurilishi rejalashtirilgan», deyiladi xabarda.

Shuningdek, qayd qilinishicha, «Parkensoy» bo‘yida yangi avtoyo‘l, ko‘pqavatli uy-joylar, ijtimoiy soha, savdo va xizmat ko‘rsatish obektlarining qurilishi boshlangan. Tuman markazidagi ko‘prik rekonstruksiya qilinyapti, yoz oylarida transport oqimi ko‘payadigan asosiy yo‘lni tunnel orqali Zarkent va So‘qoq yo‘liga ulash ishlari ketyapti.

Ta’kidlanishicha, qurilish maydonining fuqarolar foydalanuvida bo‘lgan qismida, amaldagi qonunchilikka binoan, «o‘zaro kelishuv va xolis, adolatli baholashdan» keyin ishlar boshlanadi. «Hech kimning norozi bo‘lishiga yo‘l qo‘yilmaydi».