Qashqadaryoda xotinini ov quroli bilan otib qo‘ygan erkakka hukm o‘qildi

Qashqadaryo viloyati Qarshi tumanida mast qiluvchi ichimlik ta’sirida xotinini otib qo‘ygan erkakka hukm o‘qilgan. Bu haqda IIV axborot xizmati xabar bermoqda.

Hodisa 2024 yil 23 may kuni soat 17:30 larda sodir bo‘lgan. Erkak ko‘chasidagi savdo do‘konidan mast qiluvchi ichimlik iste’mol qilib uyiga borgan.

U uyida ishlayotgan ustalarga yordam bermoqchi bo‘lganida xotini ularga xalaqit bermang deb janjal ko‘targan.

“Ovoza” informatsion dasturida berilgan lavhada aytilishicha, tortishuv davom etayotgan paytda erkak uyidagi seyfda turgan ov miltig‘ini olib chiqib, o‘qlagan. So‘ng xotinini qo‘rqitib qo‘yish uchun qurolni unga qarata o‘nglagan

Shu paytda ayol ko‘chaga qochib chiqqan. Erkak esa taxminan 20-30 metrlar chamasi masofadan yerga qaratib o‘q uzgan. Miltiqdagi sochma o‘qlarning bir qanchasi ayolga tegib, uni jarohatlagan.

Ayol zudlik bilan shifoxonaga olib ketilgan. Erkakni esa IIB xodimlari qo‘lga olgan.

Sud majlisida erkak aybiga qisman iqrorligini, aslida xotinini jarohatlash niyati bo‘lmaganini, uni qo‘rqitib qo‘yish maqsadida quroldan yerga qarata o‘q uzganini aytgan.

Jinoyat ishlari bo‘yicha Qarshi tumani sudida o‘tkazilgan sud majlisida erkak Jinoyat kodeksining 126 prim bir moddasi 3-qismi bilan aybdor deb topilgan.

Sudya unga bir yil ozodlikdan mahrum qilish jazosini tayinlagan.