Iordaniya va G‘arbiy Sohil chegarasidagi otishmada isroilliklar halok bo‘ldi

Iordaniya va Isroil tomonidan istilo qilingan G‘arbiy Sohil o‘rtasidagi chegarada sodir bo‘lgan otishmada uch kishi halok bo‘ldi. Bu haqda Isroil rasmiylari xabar berdi, deb yozdi BBC.

Bu mintaqadagi keskinlikni kuchaytirgan 7 oktyabr hodisalaridan beri Iordaniya chegarasida yuz bergan birinchi shunday mojarodir.

Isroil mudofaa kuchlari Allenbi ko‘prigidagi otishmada uch nafar isroillik fuqaro halok bo‘lganini ma’lum qildi. Hujumchi yuk mashinasida Iordaniya tomondan kelgan, so‘ngra odamlarga qarata o‘t ochgan.

Haydovchi «yuk mashinasidan tushib, ko‘prikda ishlayotgan Isroil xavfsizlik kuchlariga qarata o‘t ochdi», deyiladi harbiylar bayonotida.

Xavfsizlik kuchlari o‘q otgan shaxsni «yo‘q qildi», Isroil harbiylari esa yuk mashinasida portlovchi moddalar bor-yo‘qligini tekshirmoqda.

Iordaniya rasmiylari chegarani yopganini va holat yuzasidan surishtiruv boshlanganini e’lon qildi. Isroil hukumati ham Iordaniya bilan chegarani yopdi.

Ushbu ko‘prik Amman va Quddus o‘rtasida joylashgan bo‘lib, G‘arbiy Sohil va Iordaniya o‘rtasidagi yagona rasmiy chegara o‘tish joyidir. U orqali Isroil hududidan o‘tmasdan G‘arbiy Sohilga kirish mumkin. Nazorat punktida Isroil xavfsizlik kuchlari bilan birga xususiy qo‘riqchilar ishlaydi.

Isroil va Iordaniya 1994 yilda tinchlik shartnomasini imzolagan va xavfsizlik bo‘yicha hamkorlik qiladi. Har kuni tovar yuklangan o‘nlab yuk mashinalari bu joydan G‘arbiy Sohil va Isroil bozoriga yuk olib o‘tadi.