Niderlandiyada karantin choralari yumshatiladi

Niderlandiya hukumati koronavirus epidemiyasiga qarshi kurashish doirasida kiritilgan karantin choralarini qisman yumshatishga qaror qildi. Bu haqda NL Times nashri yozmoqda.

"Raqamlar hali ham juda yuqori, ammo pasayish bo‘layotgani yaxshi. Dekabr o‘rtalarida ehtiyotkorlik bilan oraliq qadamni qo‘yishga umid qilmoqdamiz", - dedi mamlakat bosh vaziri Mark Ryutte.

 Karantin choralari 17 noyabrdan boshlab yumshatiladi.

Xususan, jamoat markazlari, kutubxonalar, teatr, kinoteatr, muzey, basseynlar, ko‘ngilochar parklar ishlashiga ruxsat beriladi.  

 Restoran va qahvaxonalar hozircha ochilmaydi. Ommaviy tadbirlar o‘tkazishga ham ruxsat berilmaydi.

Cheklovlar 8 dekabrda yana bir bor ko‘rib chiqiladi.

 Niderlandiyada oktyabr oxiri bilan solishtirganda, kasallanish holatlari aniqlanishi kamayib bormoqda. O‘shanda kuniga 10-11 ming holat qayd etilgan bo‘lsa, oxirgi haftada 5-6 mingga yaqin bemor aniqlandi.