Испания соҳилларидан қўл-оёқлари боғланган беш кишининг жасади топилди

Испания фуқаролик гвардияси Балеар денгизидан қўл ва оёқлари боғланган беш кишининг жасадини топди, деб ёзмоқда Daily Mail.

Қайд этилишича, улар Испанияга Жазоирдан кечув орқали сузиб келишга уринган мигрантлар бўлиши мумкин. Бундай йўналиш аллақачон минглаб инсонларнинг умрига зомин бўлишга улгурган.

Шунингдек, қирғоқдан яна бир неча кишининг жасади топилган. Афтидан, улар қасддан ўлдирилган. Тергов версиясига кўра, чегарани кесиб ўтишда юзага келган можаро туфайли мигрантларнинг қўл-оёқлари боғланиб, бортдан отиб юборилган бўлиши мумкин.

Жазоирдан мигрантларни ноқонуний ташиш билан шуғулланувчи кемаларнинг йўловчилари қандай вазиятга тушиб қолганликларини англагани боис ҳуқуқ-тартибор ходимлари билан алоқага бормайди — бу эса терговни янада қийинлаштиради.

Мазкур ҳолатда жасадлар бир ой давомида топилган. Улардан бирини 18 май куни хусусий кема йўловчилари пайқаб қолган. Воқеа жойига етиб келган Испания фуқаролик гвардияси ходимлари жасадни сувдан чиқарган. Ҳалок бўлган шахс қутқарув нимчасида, қўл-оёқлари эса боғланган ҳолатда бўлган.

Таъкидланишича, сўнгги вақтларда Балеар денгизида мигрантларни ташиш билан шуғулланувчи кўплаб қайиқлар аниқланган. 20 июндан 22 июнга қадар Испания ҳуқуқ-тартибор органлари соҳилга келишга уринган 344 кишини қутқарган.

Ҳалок бўлганлар жасади пляжлардан топилмоқда. Масалан, Кан-Пастиля яқинидаги денгиздан инсон оёғи топилган. Шунингдек, оёқсиз аёл жасади ва инсон скелетига ҳам дуч келинган. Умумий ҳисобда ярим йил давомида Балеар қирғоқларидан 30 кишининг жасади қолдиқлари топилган. Испания газеталари айрим маҳаллий пляжларни «қабристон» деб атамоқда.