Путин: Россия ва Ўзбекистон миграция масалаларини биргаликда ҳал қилади

Россия ва Ўзбекистон миграция масалаларини биргаликда ҳал қилишга, Россияда ишлайдиган одамларни олдиндан тайёрлашга келишиб олган. Бу ҳақда Россия президенти Владимир Путин ТАСС агентлиги томонидан дунёнинг етакчи ахборот агентликлари раҳбарлари билан ташкил этилган учрашувда маълум қилди.

«Ўзбекистонда 30 йилча олдин 15-18 миллион одам яшаган. Ҳозир эса 38 миллион киши. Ҳар йили аҳоли бир миллионга ошмоқда. Ҳар йили. Тушуняпсизми барчаси қандай тез ўзгармоқда.

Албатта, биз меҳнат бозорида ҳам, ижтимоий соҳада ҳам кўплаб масалалар борлигини тушунамиз. Барчамиз буни англаймиз. Шу сабабли [Ўзбекистон президенти] Шавкат Миромонович [Мирзиёев] билан миграция масалаларини биргаликда ҳал қилишга келишиб олдик. Чунки бизда меҳнат бозори бугун қандай аҳволда экани маълум. 

Сизда (Ўзбекистонда) маълум даражада босим кузатилмоқда. Лекин нима қилишни биргаликда келишиб олдик. Россияда ишлашни хоҳлайдиган одамларни тайёрлаш масаласини ҳал этамиз.

Бу рус тилини, рус маданиятини ўрганишга тааллуқли ва ҳоказо – бунда бутун бошли режа яхши. Умид қиламанки, буларнинг барчасини биз ташкил этамиз», – деган Путин.

У ёшлар билан ишлаш муҳим аҳамиятга эгалиги, шунинг учун ҳозирда Россия ва Ўзбекистон ёшлари ўртасидаги алоқаларни ривожлантиришга катта эътибор қаратилаётганини таъкидлаган.

«Бу борада ёшлар билан ишлашнинг ўзи ҳам жуда муҳим ва қимматлидир. Бу ерда мен сизнинг фикрингизга тўлиқ қўшиламан. Билишимча, Шавкат Миромоновичнинг ёрдамчиси – Саида Шавкатовна яқинда Москвада бўлган ва кўплаб ҳамкасбларим билан ҳукуматда, Президент администрациясида учрашган. У президент топшириғига биноан ёшлар ўртасидаги алоқаларни ривожлантиришга, таъбир жоиз бўлса, ушбу ёшлар йўналишини ривожлантиришга катта эътибор қаратмоқда.

Бу ерда аниқ таклифлар мавжуд, шубҳасиз, ҳаммамиз биргаликда бунинг устида ишлаймиз. Ёшлар йўналиши энг муҳимларидан бири экани аниқ, фикрингизга тўлиқ қўшиламан», – деган Россия президенти ЎзА бош директори Абдусаид Кўчимовнинг саволига жавобан.