Хоразмда ёш йигит бошқарувидаги Tracker каналга қулади 

Хоразм вилоятининг Урганч шаҳрида ёш йигит бошқарувидаги Tracker машинаси ЙТҲга учради. Бу ҳақда Kun.uz манбаси хабар берди.

Маълум бўлишича, ЙТҲ 30 май куни содир бўлган. 2006 йилда туғилган йигит тенгдош дўстларини миндирган ҳолда Tracker машинасида катта тезликда кетаётиб, бошқарувни йўқотган. Бунинг оқибатида машина каналга қулаган. Бу пайтда каналда сув бўлмаган.

ЙТҲда машинада йўловчи сифатида бўлган 2 нафар йигит тан жароҳати олиб, шифохонага ётқизилган. Улардан бирининг онаси Kun.uz’га мурожаат қилди.

“Машинани бошқарган йигитнинг ҳайдовчилик гувоҳномаси бўлмаган. У машинани яқинда сотиб олган, ҳали ўз номига расмийлаштириб ҳам олмаган экан. Ўғлим олд йўловчи ўриндиғида бўлган. Машина каналга қулаганда ўғлим ташқарига отилиб чиқиб кетган. Жароҳати жиддий. Ўзим минг хавотирда ўтирган бир пайтимда машина бошқарувида ўғлим бўлгани ҳақида туҳмат қилишмоқда”, дейди аёл.

Унинг қўшимча қилишича, ҳозирда ҳолат юзасидан дастлабки тергов ҳаракатлари олиб борилмоқда. Машина бошқарувида ким бўлгани экспертиза хулосалари билан аниқланади.