Ўзбекистон ва Латвия Осиё йўналишида қўшма авиарейсларни ишлаб чиқади

Ўзбекистон элчиси Тимур Раҳмонов Латвиянинг янги тайинланган транспорт вазири Атис Швинка билан учрашди.

Мулоқот чоғида Ўзбекистон-Латвия икки томонлама савдо-иқтисодий ва транспорт-логистика ҳамкорлигини янада ривожлантириш масалалари муҳокама қилинди.

Латвия томони Ўзбекистонни Марказий Осиё минтақасидаги асосий ҳамкори сифатида кўришини таъкидлади. Шунингдек, мамлакатлар ўртасида савдо-иқтисодий ҳамкорлик фаоллашгани ва икки томонлама товар айирбошлаш ҳажми ошгани урғуланди.

– Расмий Рига транспорт ва логистика соҳасидаги ҳамкорликни янада чуқурлаштиришдан манфаатдор, – деди вазир Атис Швинка. – Латвиянинг Ўзбекистондаги элчихонасида транспорт масалалари бўйича атташе лавозими очилгани бунинг тасдиғидир. Биз ўзбекистонлик экспортёрлар ва мамлакатларимиз порт инфратузилмаси ўртасида ўзаро ҳамкорликни йўлга қўйишга, шу жумладан, преференциялар бериш масалаларида кўмаклашишга тайёрмиз.

Учрашув давомида, шунингдек, Uzbekistan Airways'нинг Тошкент-Рига йўналиши бўйича парвозлари сонини ошириш, авиакомпаниялар ўртасидаги ҳамкорликни кенгайтириш, жумладан, Осиё йўналишида қўшма рейсларни ишлаб чиқиш, электрон тижоратни фаоллаштириш ва мамлакатда Латвия почтаси ваколатхонасини очиш имкониятлари кўриб чиқилди.

#Латвия #авиарейс #Тимур Раҳмонов