Трамп Маскка Оқ уйнинг олтин калитини топширди

АҚШ президенти Доналд Трамп Илон Маскка Оқ уйнинг олтин калитини совға қилди. Трансляция Х ижтимоий тармоғи орқали амалга оширилди.

Қайд этилишича, Трамп ушбу совғани миллиардерга унинг махсус давлат хизматчиси сифатидаги фаолияти учун берган.

Кадрлардан кўриш мумкинки, АҚШ президенти совғани Оқ уй белгилари туширилгани ёғоч қути ичидан олган. Катталиги кафтдек келадиган калитга нақшлар ҳам туширилган. 

«Раҳмат, Илон. Ўзингни асра», — деди Трамп.

Маск давлат хизматчилигини якунлаганидан кейин ҳам сиёсатчининг «дўсти ва маслаҳатчиси» мақомини сақлаб қолишини маълум қилди.

Олдинроқ Трамп 30 май Илон Маскнинг АҚШ Ҳукумат самарадорлиги департаменти раҳбарлиги лавозимидаги охирги иш куни эканини эълон қилганди. Шундан кейин The New York Times ўз манбаларига таяниб, Маск Трампнинг сайловолди кампаниясида гиёҳванд моддалар қабул қилгани ҳақида ёзди. Оқ уй аппарати раҳбарининг ўринбосари Стивен Миллер журналистларга наркотик ҳақида Маскнинг ўзидан сўраб кўришни тавсия қилди.

Апрел ойида Маск ўз компанияларида кўпроқ ишлашни режалаштираётганини, DOGE учун эса ҳафтасига атиги бир-икки кун ажратишини айтганди. 

Ўтган ҳафта бошида эса Илон Маск сиёсатдан кетиш қарорини эълон қилди. Қатар Иқтисодий форуми арафасида Bloomberg агентлигига берган интервюсида у келажакда сиёсатга анча кам вақт ажратишни режалаштираётганини ва 2008 йилдан бери ўзи раҳбарлик қилиб келаётган Tesla компаниясини бошқаришга эътиборни кучайтирмоқчи эканини айтди: «Менимча, етарлича иш қилдим», деб қўшимча қилган у.