Москвада шаҳарни билишини исботлаб бермаган таксичилар жаримага тортилади

Россия пойтахтида такси ҳайдовчилари учун мажбурий имтиҳон жорий қилинди: улар тест топшириб, шаҳардаги муҳим объектлар жойлашуви ҳақидаги билимларини кўрсатиши керак. Бу тестдан ўтмай туриб кира қилишга чиққанлар жаримага тортилади. 2023 йилда Москвада таксичилик қилаётган ўзбекистонликлар сони 5 мингга яқин экани айтилганди.

Фото: РБК

Россия пойтахти Москва шаҳрида такси ҳайдовчилари давлат, транспорт, ижтимоий ва бошқа муҳим объектлар жойлашуви ҳақидаги билимларини синовдан ўтказувчи тестни топшириши шарт. Имтиҳондан ўтмасдан таксичилик қилганларга 5 минг рубл жарима хавф солади. Шу мазмундаги қонун Москва мэри Сергей Собянин томонидан имзоланди.

Тест 20 дақиқа давом этади ва уни муваффақиятли топшириш учун тўққизта саволдан саккизтасига тўғри жавоб бериш керак.

Тест доирасида такси ҳайдовчиларининг Москва транспорт инфратузилмаси, маданий мерос объектлари, тиббиёт муассасалари, таълим ва спорт иншоотлари, давлат ва шаҳар ҳокимияти бинолари, шунингдек, уларга борадиган йўналишлар, фавқулодда вазиятларда ҳаракатлар, йўловчилар ва юкларни йўловчи таксиларида ташиш қоидалари бўйича билимлари синовдан ўтказилади. Тест бепул ва олинган сертификат икки йил давомида амал қилади.

2023 йилда Халқаро Евросиё «Такси» форумида Москвадаги деярли 332 минг ҳайдовчининг 79 мингга яқини Қирғизистон, 7 минг нафари Тожикистон ва 5 мингга яқини Ўзбекистон фуқаролари экани маълум қилинган эди.

#Сергей Собянин #Москва #миграция #Россия #такси