Кремл Путин-Зеленский учрашуви қачон ўтказилиши мумкинлигини маълум қилди

Россия президенти Владимир Путин ва Украина президенти Володимир Зеленскийнинг учрашуви ўтказилиши мумкин, бироқ музокара олиб бораётган делегациялар «маълум келишувларга» эришгандан кейингина», деди Россия президенти матбуот котиби Дмитрий Песков.

«Биз бундай учрашувни икки томон делегацияларининг маълум келишувларга эришиш йўлидаги фаолияти натижаси деб ҳисоблаймиз, лекин айнан иш натижасида ва икки томон келишувлари кўринишида маълум натижаларга эришилганидан кейин бўлиши мумкин», деди Песков.

Песков, шунингдек, Россия ўт очишни тўхтатиш учун ўз шартлари рўйхатини тайёрлаётганини ва уни Украинага топширишини тасдиқлади. Аввалроқ россиялик музокарачилар раҳбари Владимир Мединский Москва ва Киев бундай шартларни навбатдаги учрашувгача батафсил баён қилишга келишиб олганини айтганди.

Истанбулдаги Украина делегацияси раҳбари Рустем Умеров музокаралардан сўнг ўтказилган матбуот анжуманида «кейинги қадам етакчилар даражасида учрашув ташкил этиш бўлиши кераклигини» айтди. Мединскийнинг айтишича, музокаралар давомида Украина делегацияси бундай учрашувни таклиф қилган ва россиялик музокарачилар «бу илтимосни инобатга олган».

Музокаралардан бир неча кун олдин Зеленский Путинни Туркияда шахсий учрашув ўтказишга қайта-қайта чақирган эди. Музокаралар бошланган куни у Анқарага борди ва яна бир бор Россия президенти билан учрашишга тайёрлигини билдирди. Путин бу таклифга ҳеч қандай муносабат билдирмади.