“Жаҳлдор ўқитувчи” — Самарқандда педагог болаларга ўта қўпол муносабатда бўлди

Булунғур туманидаги 37-мактабда содир бўлгани айтилаётган видеода ўқитувчи болалар билан жуда қўпол муносабатда бўлгани, ҳивчин кўтариб ўқувчиларни аёвсиз койиб бергани кўринади. Мактаб вазирлиги вазиятни ўрганаётганини маълум қилди.

Фото: Kun.uz

Самарқанд вилояти Булунғур туманининг 37-мактабида ўқитувчи ўқувчиларга ўта қўпол муносабатда бўлгани айтилмоқда. Kun.uz’га юборилган видеода эркак ўқитувчи синфхонага жаҳл билан кириб, болалар билан қўпол муносабатда бўлгани акс этган. 4 дақиқа-ю 55 сонияли видеода ходим бир нечта болага қўл кўтаргани, уларга аёвсиз танбеҳ бергани кўринади.

Таҳририят ҳолат юзасидан изоҳ олиш учун видеони Мактабгача ва мактаб таълими вазирлигига тақдим қилди. Ҳозирда вазият ўрганилаётгани, қўшимча ахборот берилиши айтилди.

Эслатиб ўтамиз, аввалроқ Самарқанд шаҳридаги мактаблардан бирида дарсга кеч келган 7-синф ўқувчисига ташланиб, унга зўрлик ва тазйиқ ўтказган ўқитувчи ишдан олинганди.

Хоразмда эса мактаб директори сочи ўрилмаган қизни калтаклаган видеоси тарқалганди. Ҳолат ортидан директор дастлаб маъмурий жавобгарликка тортилиб, педагогга хос бўлмаган ҳаракатлари учун ҳайфсан жазосини олган, кейинроқ ишдан бўшатилганди.

#Самарқанд #педагог #ўқитувчи