Нидерландиядаги музейда бола 50 млн евролик картинага шикаст етказди

Ҳодиса полотнони ҳеч ким кузатмаётган вақтда содир бўлган. Мутахассислар айни пайтда санъат асарини қандай қилиб тиклашни баҳоламоқда.

Роттердамдаги Boymans van Beningen музейида ёш бола америкалик таниқли рассом Марк Ротконинг «Grey, Orance on Maroon, No.8» номли картинасига тасодифан шикаст етказди. Кўнгилсиз ҳодиса Depot залида — музейнинг коллекциядан танланган асарлари намойиш этиладиган омборида юз берди, деб ёзади BBC.

Картина қиймати 50 миллион еврога етиши мумкин. Музей вакилининг маълум қилишича, ҳодиса полотнони ҳеч ким кузатмаётган вақтда содир бўлган. Картинанинг лак билан ҳимояланмаган пастки қисмида кичик тирналишлар пайдо бўлган.

Музейдагиларга кўра, зарар юзаки ҳисобланмоқда, Нидерландия ва бошқа мамлакатлар мутахассислари айни пайтда санъат асарини қандай қилиб энг яхши тарзда тиклашни баҳолаяпти. Реставрациядан кейин картина яна намойишга қўйилиши кутилмоқда.

Реставрация бўйича мутахассисларнинг тушунтиришича, лак ҳимоя қатлами билан қопланмаган замонавий асарлар, хусусан, Ротконинг картиналари, айниқса шикастланишга мойил. Ҳатто энг кичик тирналишлар ҳам асарнинг қабул қилинишига жиддий таъсир кўрсатиши мумкин. Асарларни тиклаш жараёни эса рассом ишлатган бўёқлар ва елимларнинг таркиби туфайли янада мураккаблашади.

Эслатиб ўтамиз, 2024 йил сентябрда Ван Гогнинг «Кунгабоқарлар»ига шўрва сепган фаоллар озодликдан маҳрум этилганди. Судда ўз манфаатларини ўзи ҳимоя қилган айбланувчилардан бири бу нафақат фаолларга, балки «демократия асосларига» ҳам чиқарилган эканини таъкидлаганди.

#Нидерландия #картина #Ротко