Юзлаб инсонларни чув туширган автолизингчиларга ҳукм ўқилди

Турли МЧЖлар ташкил қилиб, осон шартларда машина олиб бериш ваъдаси билан одамларни алдаган 13 киши жиноий жазога тортилди. Судланганларнинг 2 нафари аёл. Улардан бири 6 ой олдин “Тоштурма”да фарзандли бўлган. Аёлнинг тайинланган жазони 3 йил муддатга кечиктириш ҳақидаги илтимосномаси суд томонидан рад этилди.

Фото: Видеодан кадр

Тошкентда бир нечта МЧЖлар ташкил этиб, машина олиб беришни ваъда қилган ҳолда 600 нафарга яқин одамни чув туширган 13 кишига ҳукм ўқилди. Суд уларга турли муддатларга озодликдан маҳрум қилиш жазоси тайинлади.

Судланувчилар олдинроқ 450 дан ортиқ жабрланувчининг аризаси билан жиноий жазога тортилганди. Жиноят ишлари бўйича Чилонзор туман судида яна 180 дан ортиқ жабрланувчининг аризасига кўра ушбу шахсларга нисбатан жиноят иши кўриб чиқилди.

Маълум қилинишича, судланувчиларнинг 2 нафари аёл киши. Улардан бири, ҳисобчи вазифасида ишлаган аёл бундан 6 ой олдин “Тоштурма”да фарзандли бўлган.

“14 ойдан бери Тоштурма”даман. Боламни ҳам ўша ерда туғдим. Болам 6 ойлик бўлди. Лекин ҳеч ким менинг эҳтиёт чорамни ўзгартириб бермади”, деган аёл судда.

Судланувчилар «Ishonch Auto Leasin», «Ishonch Leasin Car», «Mega Avto Leasin», «Mega Auto Leasin-Hamkor», «Asr Auto Leasin», «Asr Auto» каби МЧЖлар очиб, фуқароларга автомобил олиб беришни ваъда қилишган. Улар шартнома қилганларнинг кам қисмига машина олиб берган.

Судланувчилар 189 дан ортиқ жабрланувчига жами 5 млрд 240 млн сўмдан ортиқ моддий зарар етказган. Улар тушган маблағларнинг кўп қисмини ўзлаштириб юборишган. Шу сабабли янги МЧЖлар ташкил этиб, улардан тушган маблағ ҳисобига олдинги МЧЖ билан шартнома тузган фуқароларга машина олиб берган. Ушбу шаклдаги молиявий пирамида оқибатида судланувчилар фуқаролардан катта миқдорда қарз бўлиб қолган.

Суд ҳукми билан судланувчиларга турли муддатга озодликдан маҳрум қилиш жазоси тайинланди. Икки аёлдан бири 6 йил 6 ой, чақалоғи бўлган аёл эса 6 йил 1 ой муддатга озодликдан маҳрум қилиш жазосига тортилди.

Болали аёлнинг тайинланган жазони 3 йил муддатга кечиктириш ҳақидаги илтимосномаси суд томонидан рад этилди. Судланувчи буни ҳисобчи лавозимида ишлаган аёл жуда катта миқдордаги суммани танишларининг банк карталарига ўтказиб, нақдлаштиргани билан изоҳлаган.

Олдинроқ “Umid avto” раҳбари Абдуманноп Абдураҳмонов қамоққа олингани, у жуда кўп миқдордаги фирибгарликда гумонланаётгани хабар қилинганди. Бундан олдин эса Kun.uz суриштирувидан сўнг “Halal Auto Leasing kompany” МЧЖ мансабдорлари қамоққа олинганди.

#Тошкент #суд #фирибгарлик #автолизинг