Ўзбекистоннинг Андоррадаги биринчи элчиси тайинланди

Ўзбекистоннинг Испаниядаги фавқулодда ва мухтор элчиси Фаррух Турсунов Андоррада ҳам элчилик қилади.

Фото: dunyo.info

Ўзбекистон элчиси Фаррух Турсунов Андорра ҳамраиси, Франция президенти Эммануэль Макронга ишонч ёрлиқларини топширди. Элчи қароргоҳи Мадридда жойлашган.

Франция етакчиси Ўзбекистон билан икки томонлама ҳамкорликни мустаҳкамлаш муҳим вазифа эканини алоҳида таъкидлаб, элчининг профессионал дипломатик маҳорати мамлакатларимиз ўртасидаги муносабатларни янада ривожлантиришга катта ҳисса қўшишига ишонч билдирди.

«Биз Ўзбекистон билан дўстона алоқаларни мустаҳкамлашга катта аҳамият қаратамиз ва барча соҳаларда ҳамкорликни янада кенгайтиришга тайёрмиз», деди Макрон.

Ўзбекистон ва Андорра ўртасидаги дипломатик муносабатлар 2009 йил 1 декабрда ўрнатилган.

Эслатиб ўтамиз, Фаррух Турсунов Ўзбекистоннинг Испаниядаги фавқулодда ва мухтор элчиси сифатида 2023 йил 7 декабрь куни Мадридда иш бошлаган. Дипломат 2024 йил 9 апрелда Ўзбекистон элчиси сифатида Испания қироли Филипп VI га ишонч ёрлиқларини топширган.

Шунингдек, Фаррух Турсунов мамлакатимизнинг «БМТ Туризм» ташкилотидаги (аввалги Бутунжаҳон туризм ташкилоти) доимий вакили ҳисобланади.

#элчи #Андорра #Фаррух Турсунов