Германияда «рейхсбюргерлар» ҳаракати аъзоларига ҳукм ўқилди

Кобленц Олий минтақавий суди Германия Федератив Республикаси мавжудлигини тан олмайдиган ва давлат тўнтаришига тайёргарлик кўрган «Рейхсбюргерлар» ҳаракатининг беш нафар аъзосига ҳукм ўқиди. Айбланувчилар 2 йилу 10 ойдан 8 йилгача қамоқ жазосини олди, деб хабар берди Tagesspiegel.

Ҳаракат иштирокчилари устидан суд жараёни 2024 йил май ойида бошланган. «Рейх фуқаролари» деб номланган террорчилик ташкилоти аъзоларини қўлга олиш бўйича махсус операция 2022 йил декабрида бўлиб ўтган. Шунда немис зодагон оиласи вакили шаҳзода Генрих XIII Ройс бошчилигидаги ўнг радикаллар гуруҳининг бир неча аъзолари ҳибсга олинган эди. Судланувчилар орасида шаҳзодадан ташқари собиқ судья, собиқ парламент аъзоси ва бир қанча истеъфодаги ҳарбий хизматчилар – жами тўққиз киши бор.

2024 йил ноябрида суд ҳаракат иштирокчиларидан бирини икки ярим йилга озодликдан маҳрум қилди. Тез орада яна икки маҳбус, жумладан ҳаракат раҳбари Генрих Ройсга нисбатан суд қарорлари чиқиши кутилмоқда.

«Рейхсбюргерлар» Германия Федератив Республикасини тан олмайди ва ўзини «Германия рейхи» фуқаролари деб билади. Улар мавжуд бўлмаган империя учун муқобил «шахсни тасдиқловчи карталар» ва «ҳайдовчилик гувоҳномалари» яратган. Ҳаракат 1980 йилларда пайдо бўлган. 2017 йилда Германияда унинг тарафдорлари сони 16 мингдан ошди.