Япониялик олимлар ҳидларни аниқлай оладиган дрон яратди

Ушбу қурилмадан газ сизиб чиқиши ёки бошқа хавфли моддаларни аниқлаш учун фойдаланиш мумкин.

Фото: iStock

Япониялик олимлар ҳидларни аниқлаш қобилиятига эга махсус антеннали биоҳибрид дрон ишлаб чиқди.

Анъанавий дронлар навигация учун визуал сенсорлардан фойдаланади, бироқ бундай тизимлар ёруғлик кам, чанг ёки нам шароитларда қийинчиликларга дуч келади. Бу чеклов дронларнинг табиий офатлардан зарар кўрган ва атроф яхши кўринмайдиган ҳудудларда ишлашини мураккаблаштиради.

Янги технология газларни аниқлаш, табиий офатларга муносабат билдириш ва атроф-муҳитни назорат қилишда дронларнинг самарадорлигини ошириш учун биологик сезгир механизмлардан фойдаланади. Ҳашаротларнинг табиий ҳид сезиш қобилиятини замонавий робототехника билан уйғунлаштирган ҳолда, тадқиқот гуруҳи анъанавий дрон технологиясидаги чекловларни бартараф этишга муваффақ бўлди.

Куя каби ҳашаротлар ўзларининг ҳид билиш қобилиятидан озиқ-овқат топиш, йиртқичлардан қочиш ва жуфт излаш учун фойдаланади. Эркак куялар бир неча километр масофадан феромонларни илғай олади, бунинг учун улар ҳид манбаини аниқлаш жараёнидан фойдаланади. Ушбу табиий қобилиятдан илҳомланган ҳолда, Синсю университети доценти Дайго Теруцуки раҳбарлигидаги тадқиқотчилар айнан шу механизмга тақлид қилувчи дрон яратишга эришди.

Дроннинг ҳидни аниқлаш масофаси 5 метргача етади.

Қурилмани газ сизиб чиқиши ёки бошқа хавфли моддаларни (портловчи ёки гиёҳванд моддаларни) аниқлаш, ёнғинларни эрта аниқлаш, шунингдек, оддий визуал сенсорлар самарали ишлай олмайдиган офат зоналарида қўллаш мумкин.

#Япония #технология #ихтиро #дрон