Италияда мушук сабаб самолёт парвози икки кунга кечиктирилди

Ryanair авиакомпаниясининг Римдан Германияга парвоз қилиши керак бўлган самолёти учишдан бир неча дақиқа олдин бортга мушук кириб қолгани туфайли икки кун ушланиб қолди. Бу ҳақда The Sun хабар бермоқда.

Авиакомпания ходимлари йўловчиларни самолётга таклиф этишга тайёрланаётган пайтда миёвлаган овозни эшитиб қолган. Мушук электр жиҳозлари жойлашган бўлимдан топилди, аммо уни тутишнинг иложи бўлмади: жонивор симлар орасига яшириниб олганди.

Мушук турган жойга етиш учун муҳандислар бир неча юк панелларини ечиб олди. Бироқ бу фойда бермади: мушук жойидан қимирламади. Охир-оқибат электр жиҳозлар бўлмасининг эшигини очиқ қолдиришга қарор қилинди — вақт ўтгандан кейингина мушук ўз ихтиёри билан самолётни тарк этди.

Авиакомпания ходимлари унинг зинапоядан эҳтиёткорлик билан тушаётганини тасвирга олишга муваффақ бўлди. Сўнг самолёт ниҳоят Германияга парвоз қилди.

Аввалроқ Япониядаги аэропортда йўқолган қайчи сабаб ўнлаб рейслар бекор қилинганди. Масъул ходимлар йўқолган қайчини топишга икки кун уринган.