Рубоб ясаш бутунжаҳон маданий мероси деб эътироф этилди

ЮНEСКО рўйхатига кирган Ўзбекистонга оид номоддий мерос элементлари сони 16 тага етди.

Фото: Маданият ва санъатни ривожлантириш жамғармаси

Рубоб ясаш ва ижрочилик санъати инсоният номоддий маданий меросининг репрезентатив рўйхатига киритилди.

Тегишли қарор 4 декабр куни Номоддий маданий меросни муҳофаза қилиш бўйича ЮНEСКО ҳукуматлараро қўмитасининг Асунсион (Парагвай) шаҳрида бўлиб ўтган 19-сессиясида қабул қилинди.

Қарорда рубоб Марказий, Жанубий ва Жануби-Ғарбий Осиё ҳудудларидаги энг қадимий мусиқа асбобларидан бири сифатида эътироф этилган.

Ўзбекистон Маданият ва санъатни ривожлантириш жамғармаси хабарига кўра, кўпмиллатли номзоднома ҳужжатини тайёрлашда Ўзбекистон томонидан Миллий комиссия котибияти ва Маданият вазирлигининг мутасадди ташкилотлари иштирок этган.

Мазкур элемент Ўзбекистон Республикасидан ЮНEСКО рўйхатидан жой олган 16-элемент ҳисобланади.

Элементнинг ЮНEСКО рўйхатига киритилиши халқаро ҳамда миллий даражада унинг аҳамияти ҳақида хабардорликни оширишга, элементни аъзо-давлатлар билан биргаликда сақлашга ва келгуси авлодларга етказишда ёрдам беради, дейилади хабарда.

#ЮНЕСКО #маданий мерос #рубоб