Aloqa Ventures Royal Taxi ва Platma’ни молиялаштиради

АлоқаБанк ICT Week доирасида ўзининг янги хизмат турларини намойиш қилди ҳамда AloqaVentures томонидан стартапларга инвестиция ажратди. Ҳафталик доирасида Aloqa Ventures венчур фонди икки стартап – Royal Taxi ҳамда Platma билан инвестиция шартномасини имзолади.

Фото: Алоқабанк

Шунингдек, Aloqa Ventures Қозоғистоннинг Activat VC венчур компанияси ва School 21 IT-мактаби билан ҳамкорлик меморандуми имзолади.

Бундан ташқари, “ICTWeek Uzbekistan 2024” ҳафталиги доирасида Aloqa Ventures томонидан молиялаштирилган яна бир лойиҳа – Startup Garage ҳам намойиш қилинди. Ушбу лойиҳанинг мақсади инновациялар ва тадбиркорликни ривожлантиришга қаратилган стартап лойиҳаларни қўллаб-қувватлаш, сармоя жалб қилиш ва янги иш ўринларини яратишга кўмаклашишдан иборат.

Startup Garage доирасида йилига 20 дан ортиқ стартап лойиҳани қўллаб-қувватлаш ҳамда бу орқали Ўзбекистоннинг технологик ва иқтисодий ривожланишига ҳисса қўшиш режалаштирилган.

Ҳафталикда Алоқабанкнинг Zoomrad мобил иловасига қўшилган янги имкониятлардан бири – Face Pay тизими ҳақида ҳам маълумот берилди. Ушбу тизим савдо нуқталарида тўловларни юзни сканерлаш орқали амалга оширишга имкон беради. Бу эса иловани янада хавфсиз ва ишончли қилади. Тизим ҳозирда синов тариқасида ишга туширилган бўлиб, йил якунига қадар ундан кенг қамровда фойдаланиш мумкин бўлади.