Португалия Украина билан хавфсизлик шартномасини имзолади

Хавфсизлик келишуви доирасида Киев Россия ҳужумидан ҳимояланиш учун бу йил Лиссабондан 126 миллион евро олади.

Фото: Украина президенти офиси

Украина президенти Володимир Зеленский ва Португалия бош вазири Луиш Монтенегру 28 май, сешанба куни Лиссабонда икки томонлама хавфсизлик битимини имзоладилар.

Ҳужжат 10 йил давомида амал қилади. Монтенегру Зеленский билан қўшма матбуот анжуманида таъкидлаганидек, келишув доирасида унинг мамлакати бу йил Киевга Россия ҳужумидан ҳимояланиш учун 126 миллион евро ажратади ва «керак бўлгунча» Украинани қўллаб-қувватлашда давом этади.

Шу ҳафта бошида Володимир Зеленский Европа Иттифоқи ва НАТОнинг яна икки аъзоси билан худди шундай хавфсизлик келишувларини имзолади: 27 майда Испания ва 28 майда Белгия билан.

Украина билан хавфсизлик бўйича икки томонлама битимлар тузиш G7 мамлакатлари ташаббуси билан амалга оширилмоқда, дея эслатади dpa агентлиги. 2023 йилда Литванинг Вилнюс шаҳрида бўлиб ўтган НАТО саммити фонида «Катта еттилик» алоҳида давлатлар Украина хавфсизлигининг узоқ муддатли кафолатини таъминлаш учун у билан икки томонлама шартномалар тузишга келишиб олди. Жорий йил бошида Британия, Франция ва Германия биринчилардан бўлиб тегишли келишувларни имзолади.

Украина ва бошқа давлатлар ўртасида икки томонлама хавфсизлик шартномалари

Украина президенти Володимир Зеленский Испания, Белгия ва Португалия билан имзоланган келишувларни «жуда муҳим» деб атади, бироқ «гап пулда эмаслигини» таъкидлади. «Бу 10 йиллик келишувлар уруш яна 10 йил давом этишини англатмайди, булар Украинани модернизация қилиш ва қайта қуриш, шунингдек, гуманитар ёрдамни ўз ичига олган стратегик келишувлардир», - дея таъкидлади у.

Зеленскийнинг қўшимча қилишича, Украинага бугунги кунда зарур бўлган асосий нарса ҳаво ҳужумидан мудофаа, яъни дронлар, ракеталар ва ахборот тизимларида ёрдамдир. Украинага бу «саҳродаги сув каби» керак, деди президент.

#Украина #Португалия