Украинада демобилизация тўғрисидаги қонун қабул қилинди

Украина президенти Володимир Зеленский ҳарбий хизматга чақирилувчиларни демобилизация қилиш тўғрисидаги қонунни имзолади. 

Ҳужжатга кўра, ҳарбий ҳолат даврида хизмат муддати тугаган ва белгиланган муддатдан ошиб кетган муддатли ҳарбий хизматчилар кейинчалик президент қарори билан белгиланадиган муддатда захирага ўтказилиши мумкин. Қонуннинг ўзида демобилизация режалаштирилган аниқ сана кўрсатилмаган. Шунингдек, қонунда кейинги сафарбарликни 12 ой муддатга кечиктириш тўғрисидаги банд ҳам мавжуд. 

2023 йил ноябр ойида Миллий хавфсизлик ва мудофаа кенгаши котиби Алексей Данилов хизмат муддатини тугатган украиналик ҳарбий хизматчилар демобилизация қилинишини ва бу адолатдан эканини айтган эди. Шунингдек, у хизмат муддати тугаган, аммо армияда қолиш истагида бўлган чақирилувчилар шартнома асосида буни амалга ошириши мумкинлигини қўшимча қилди. 

Зеленский 22 феврал куни Олий Радага чақирилувчиларни демобилизация қилиш тўғрисидаги қонун лойиҳасини киритди. Тушунтириш хатида қонун лойиҳасини ишлаб чиқиш белгиланган муддатли ҳарбий хизматни ўтаган ҳарбий хизматчиларни захирага ўтказишни таъминлаш зарурати билан боғлиқлиги таъкидланган. Қонун лойиҳасида Украинадаги ҳарбий ҳолат даврида мажбурий ҳарбий хизматнинг белгиланган муддатларини ўтаган ҳарбий хизматчиларни захирага ўтказиш имкониятини меъёрлаштириш таклиф қилинмоқда. Бу эса ҳарбий хизматнинг белгиланган муддатларини ўтаган ҳарбий хизматчиларни 2024 йилда захирага ўтказиш имконини беради.