Фарғонада дарахт кесилиши ортидан келиб чиққан жанжалда аёл киши ўлдирилди

Фарғона шаҳрида жойлашган ҳудудда экилган теракларни кесиш пайтида келиб чиққан жанжалда эркак аёлни уриб, унга оғир тан жароҳати етказган.

Вилоят ИИБ ахборот хизматининг хабар беришича, ҳодиса 2024 йил 14 феврал содир бўлган.

Маълум бўлишича, аёл Фарғона шаҳар “Жўйдам” МФЙда жойлашган экин ер майдони четидаги терак дарахтларини кестираётган вақтида, ернинг собиқ эгаси Э.У. дарахтлар ўзига тегишли эканини айтган ва ўртада жанжал келиб чиққан.

Жанжал давомида эркак аёлнинг бош қисмига тош билан уриб, тан жароҳати етказган. Кўрсатилган биринчи тез-тиббий ёрдамга қарамасдан оғир тан жароҳати олган аёл шифохонада вафот этган.

Тайинланган судга оид тиббий экспертизанинг дастлабки хулосасига кўра аёлнинг ўлимига бош қисмидан олган оғир тан жароҳатлари сабаб бўлгани кўрсатилган.

Қайд этилишича, мазкур ҳолат юзасидан Э.У.га нисбатан Фарғона шаҳар прокуратураси томонидан Жиноят кодексининг 97-моддаси 1-қисми (қасддан одам ўлдириш) билан жиноят иши қўзғатилиб, қамоққа олинган. Ҳозирда тергов ҳаракатлари олиб борилмоқда.