БАА Ўзбекистоннинг икки ҳудудида аёллар ва болалар клиникаларини қуради

Инвестициялар, саноат ва савдо вазири Лазиз Қудратов бошчилигидаги Ўзбекистон ишчи гуруҳи БАА саноат ва илғор технологиялар вазири – «Масдар» компанияси бошқаруви раиси Султон Аҳмад ал-Жобир ва ушбу мамлакатнинг бир қатор етакчи компаниялари раҳбарлари билан учрашувлар ўтказди.

Фото: Kun.uz

Кун тартибидан инвестициявий ҳамкорлик йўналишларини кенгайтириш ва иқтисодиётнинг устувор тармоқларида янги йирик лойиҳаларни биргаликда амалга ошириш масалалари ўрин олди.

Шу тариқа, Султон Аҳмад ал-Жобир билан кимё саноати, металлургия ва геология-қидирув соҳаларида жорий лойиҳаларни амалга оширишнинг бориши ва янги сармоявий ташаббусларни амалга ошириш режалари муҳокама қилинди.

«Халифа бин Зоид ал-Наҳаян» жамғармаси бош директори Муҳаммад Ҳожи ал-Хурий билан учрашувда Нукус шаҳрида аёллар ва болалар клиникасини қуриш лойиҳаси амалга оширилаётгани таъкидланди. Қарши ва Тошкент шаҳарларида ҳам шундай шифохоналар қуриш истиқболлари, шунингдек, Ўзбекистонда янги туғилган чақалоқлар эшитиш қобилиятини текширишнинг универсал тизимини жорий этиш масалалари кўриб чиқилди.

International holding company бош ижрочи директори Сайед Басар Шуеб билан Ўзбекистоннинг соғлиқни сақлаш, энергетика ва бошқа тармоқларида қўшма лойиҳаларни амалга ошириш масалалари муҳокама қилинди. Томонлар мамлакат инвестициявий салоҳияти билан яқиндан танишиш, қўшма ташаббусларни амалга ошириш бўйича аниқ шартномалар тузиш мақсадида компания раҳбарияти ва экспертларининг Ўзбекистонга ташрифини ташкил этишга келишиб олдилар.

ADSSC бош директори Аҳмад ал-Шамси билан учрашувда асосий эътибор Тошкент шаҳридаги оқова сув тизимини ДХШ тамойиллари асосида такомиллаштириш лойиҳасини амалга оширишга қаратилди. Лойиҳа доирасида замонавий муҳандислик иншоотларини қуриш назарда тутилган. Тегишли инвестиция таклифи лойиҳаси жорий йилнинг баҳорида имзоланиши режалаштирилган.

RAK Ceramics компанияси ижрочи директори Абдаллах Массад билан учрашувда Ўзбекистоннинг қурилиш материаллари ишлаб чиқариш йўналишидаги саноат салоҳияти атрофлича кўриб чиқилди. Экспортга мўлжалланган маҳсулотлар, хусусан, кафел ва кулолчилик маҳсулотлари ишлаб чиқариш лойиҳаси устида иш бошлаш бўйича келишувга эришилди.

#БАА #клиника