Волгоградда 24 яшар ўзбекистонлик йигит жонлантириш бўлимида вафот этди

Волгоград вилоятининг Биковский туманида 24 ёшли Ўзбекистон фуқароси насосни ишга туширмоқчи бўлганида оғир жароҳат олиб, 6 июль куни жонлантириш бўлимига тушган.

Аниқланишича, у кўчма насос станциясини ишга туширмоқчи бўлган вақтида оғир тан жароҳати олган. Унинг эгнидаги узун кийим насос ва двигатель ўртасидаги милга ўралиб қолиши фожиага сабаб бўлгани айтилмоқда.  

Жабрланувчи 6 июль куни соат 03:45 да бош ёрилиши, мия чайқалиши, травматик шок ташхиси билан туман марказий шифохонасининг жонлантириш бўлимига ётқизилган.

8 июль куни эрталаб 24 яшар ўзбекистонлик шифохонада вафот этгани маълум қилинган. Маҳаллий ОАВ ички ишлар органларидан олган маълумотига асосланиб, жабрланувчи Россия ҳудудида қонуний меҳнат фаолияти билан шуғулланиб келгани ҳақида хабар берган.

Ҳозирча Ўзбекистон Ташқи ишлар вазирлиги ҳамда Бандлик ва меҳнат вазирлиги ҳузуридаги Ташқи меҳнат миграцияси агентлиги ҳодиса ҳақида ҳеч қандай хабар бергани йўқ. Марҳумнинг жасади Ўзбекистонга қачон олиб келиниши маълум эмас.

2018 йил 15 июлдаги “Ўзбекистон Республикасининг ташқи меҳнат миграция тизимини янада такомиллаштириш бўйича қўшимча чора-тадбирлар тўғрисида”ги президент қарорига мувофиқ республикадан ташқарида меҳнат миграциясида бўлган даврда вафот этган фуқароларнинг жасадлари Бандлик ва меҳнат муносабатлари вазирлиги ҳузуридаги Хорижда меҳнат фаолиятини амалга оширувчи шахсларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси ҳисобидан олиб келиниши белгиланган.

2021 йилда хорижда вафот этган 518 нафар, 2019 йилда эса 308 нафар меҳнат муҳожирининг жасади ватанга қайтарилган.