«Саховат» ва «Мурувват» интернат уйлари Божхона қўмитасига бириктирилади

Президентнинг “Саховат” ва “Мурувват” интернат уйлари ҳамда Уруш ва меҳнат фахрийлари учун республика пансионати фаолиятини ривожлантиришга доир қўшимча чора-тадбирлар тўғрисида”ги фармони лойиҳаси эълон қилинди.

Вазирлар Маҳкамаси, Соғлиқни сақлаш вазирлиги, Давлат божхона қўмитаси ва Тиббий-ижтимоий хизматларни ривожлантириш агентлигининг “Саховат” ва “Мурувват” интернат уйлари ҳамда Уруш ва меҳнат фахрийлари учун республика пансионатини (тиббий-ижтимоий муассасалар) Давлат божхона қўмитасига бириктириш тўғрисидаги таклифига розилик берилади.

Белгиланишича, Давлат божхона қўмитаси:

тиббий-ижтимоий муассасаларда васийликка олинган кексалар ва ногиронлиги бўлган шахсларга тиббий-ижтимоий хизмат кўрсатиш самарадорлигини оширишга қаратилган замонавий услуб ва ижтимоий технологияларни татбиқ этишда;
тиббий-ижтимоий муассасалар моддий-техник базасини мустаҳкамлашда, улар инфратузилмасини яхшилашда ҳамда ногиронлиги бўлган шахсларни тиббий ёрдам ва зарур дори воситалари билан таъминлашда;
тиббий-ижтимоий муассасаларда васийликка олинган кексалар ва ногиронлиги бўлган шахслар учун қулай шарт-шароитлар яратишда, уларни протез-ортопедия мосламалари ҳамда реабилитация қилиш техник ва гигиеник воситалари билан таъминлашда;
тиббий-ижтимоий муассасаларда васийликка олинган ногиронлиги бўлган шахсларни ижтимоий мослаштириш ва уларга ўз қизиқишларидан келиб чиқиб касб-ҳунар ўргатиш бўйича зарур шароитларни яратишда;
тиббий-ижтимоий муассасаларда васийликка олинган кексалар ва ногиронлиги бўлган шахслар бўш вақтини мазмунли ташкил этиш ҳамда интеллектуал, жисмоний ва ижодий қобилиятларини ривожлантиришда;
тиббий-ижтимоий муассасаларда васийликка олинган шахслар учун маънавий-маърифий ва маданий тадбирларни, шу жумладан концерт дастурларини ташкил этиш орқали уларни маданий ҳаётдаги фаол иштирокини таъминлашда Тиббий-ижтимоий хизматларни ривожлантириш агентлигига доимий равишда кўмаклашади.

Тиббий-ижтимоий муассасаларда кексалар ва ногиронлиги бўлган шахсларни ижтимоий мослаштириш ва уларга ўз қизиқишларидан келиб чиқиб касб-ҳунар ўргатиш учун ўқув устахоналар ташкил этилади.

Бандлик ва меҳнат муносабатлари вазирлиги ҳар йили камида икки маротаба тиббий-ижтимоий муассасаларда васийликка олинган кексалар ва ногиронлиги бўлган шахслар учун ошпазлик, қандолатчилик, сартарошлик, тикувчилик ва улар қизиқишларидан келиб чиққан ҳолда бошқа мос йўналишлар бўйича қисқа муддатли бепул курсларни ташкил этади.

Тиббий-ижтимоий муассасаларда ташкил этилган ўқув устахоналар Бандликка кўмаклашиш давлат жамғармаси маблағлари ҳисобидан жиҳозланади.

#Божхона қўмитаси #интернат уйи