Жаҳон банки Ўзбекистонда 24та лойиҳани молиялаштиради

Жаҳон банкининг Европа ва Марказий Осиё минтақси бўйича вице-президенти Анна Бьерденинг Ўзбекистонга қилган ташрифи якунлари бўйича мақоласи чоп этилди.

Таъкидланишича, Жаҳон Банки 2022-2026 йилларда Ўзбекистонда Шериклик дастури доирасида ислоҳотларни қўллаб-қувватлашни давом эттиради.

Амалдаги дастур бўйича, умумий қиймати 4,3 миллиард долларга тенг бўлган 24та лойиҳа молиялаштирилади. Ушбу лойиҳалар макроиқтисодий ислоҳотлар, қишлоқ хўжалиги, соғлиқни сақлаш, таълим, сув таъминоти ва санитария, энергетика, транспорт, аҳолини ижтимоий ҳимоя қилиш, шаҳар ва қишлоқларни ривожлантириш каби муҳим соҳаларда амалга оширилади.

Анна Бьерде Ўзбекистонга ташрифи давомида Жаҳон банки томонидан ажратилган умумий қиймати 289 миллион доллар ва Швейцариянинг Иқтисодий ишлар бўйича давлат котибиятининг 7,8 миллион долларлик кредитларини имзолаш маросимида ҳам қатнашган. Маълум қилинишича, ушбу маблағлар Ўзбекистоннинг учта минтақасида сув таъминоти ва канализация хизматларидан фойдаланиш имкониятларини яхшилаш ва бозорга йўналтирилган Миллий инновацион тизимни ривожлантириш бўйича лойиҳаларни амалга ошириш ишларида сарфланади.

Маълумот учун, бу Анна Бьерде хонимнинг Марказий Осиёга биринчи ташрифи ҳисобланади. Шунингдек, Жаҳон банкининг вице-президенти Қирғизистон, Қозоғистон ва Тожикистонда ҳам амалий ташриф билан бўлди. Асли Швейцария фуқароси ҳисобланадиган Анна Бьерде 2020 йил 1 майдан эътиборан Жаҳон банкининг Европа ва Марказий Осиё бўйича вице-президенти лавозимида ишлаб келмоқда.