Туркиядан келган яна бир ўзбекистонликда коронавирус аниқланди

Ўзбекистонда яна бир кишида коронавирусдан зарарланиш ҳолати қайд этилди.

Соғлиқни сақлаш вазирлиги маълумотига кўра, ушбу инфекция аниқланган фуқаро Туркияда бўлиб қайтгани маълум бўлди.

«Ўзбекистонда коронавирус инфекцияси билан касалланганлар сони айни пайтгача яна биттага ошиб, 43 нафарга етди. Ушбу инфекция аниқланган фуқаро Истанбулда бўлиб қайтгани маълум бўлди», дейилади Соғлиқни сақлаш вазирлиги маълумотида.

22 март куни Швейцариядан келган ўзбекистонликда ҳам коронавирус аниқлангани маълум бўлганди.

Коронавирус ҳақида нималарни билиш керак? Асосий саволларга жавоблар

Эслатиб ўтамиз, Ўзбекистонда вирусдан зарарланишнинг илк ҳолати 15 март куни қайд этилган, Париждан учиб келган аёлга коронавирусдан зарарланиш ташхиси қўйилганди. Кейинроқ Лондон, Истанбул ва Дубайдан келган авиарейслар йўловчиларида ҳамда улар билан алоқада бўлганларда вирус аниқланди. Швейцариядан келган рейс Ўзбекистонга вирус кириб келган бешинчи йўналиш бўлди.

Сўнгги маълумотларга кўра, бутун дунёда коронавирусга чалинганлар сони 311 мингдан ортиқни ташкил қилмоқда, 95 мингдан ортиқ киши тузалган, қурбонлар сони 13 мингдан ортиқ.
Айни вақтда вирусдан энг кўп жабр чекаётган давлатлар (Хитойдан кейинги ўринларда, вирус ўчоғи бўлган бу давлатда вирус тарқалишига деярли барҳам берилди) Италия (53578 бемор, 4825 қурбон), АҚШ (26867 бемор, 348 қурбон), Испания (25364 бемор, 1381 қурбон), Германия (22364 бемор, 84 қурбон), Эрон (20620 бемор, 1556 қурбон) ва Франция (14459 бемор) бўлиб турибди.

#коронавирус